政情:通識缺科學支撐 徐立之:必須改革

近年有唔少聲音要求改革通識科,港科院創院院長、香港大學前校長徐立之尋日出席一個教育論壇時指現時中學課程着重文多於理,又以通識科為例,課程着重文科,冇細探理科嘅奧妙,即使內含許多批判性思考,但缺乏實在嘅科學根據支撐。佢認為課程項目改革係必須,並認為應鼓勵同學選擇更多選修科。

徐立之又形容數學係科學之母,即使商科都要求相應嘅數學能力,學校應教授唔同程度嘅數學,並建議畀大學彈性決定收生準則,唔一定硬性規定喺文憑試必須取得「3322」成績。

林智中形容不專又不通

同場嘅中文大學教育學院課程與教學學系教授林智中就認為,新高中課程下培養嘅學生「既不專,又不通」,亦對其他選修科嘅重視程度不足,令唔少選修科尤其出色嘅學生,或只對專一語言出色的學生選擇出國留學,令香港損失人才。

有出席論壇嘅中學生批評教育制度死板、香港教育過分強調失敗,反而應鼓勵學生勇敢嘗試,師生關係亦唔應該建基喺上層同下層嘅關係,以亦師亦友嘅關係為佳。

第一手消息請下載on.cc東網iPhone/iPad/Android/Windows Phone Apps