政情：馮興禮下月做老竇 驚血唔敢剪臍帶
結婚生仔都係人生大事，勞工及福利局局長政治助理馮興禮（Henry），尋日滿面甜絲絲咁透露，下個月底做老竇啦！仲係一索得男添，真係恭喜晒！
問到生B係唔係佢計劃之內？佢話絕對係，但比預期早咗少少，擇咗日太太會喺十一月三十日開刀生BB，但佢會做到十一月二十九日先放假。點解咁遲先放？佢話想多啲時間去照顧太太同BB，仲話自己可以享有五天侍產假。
會入產房陪老婆生
咁會唔會入產房陪老婆生？佢話老婆要求冇得避，但透露因為自己有啲驚血，所以剪臍帶就可免則免，仲透露自己因為驚血，如果唔係一早報咗讀醫科。咁依家有冇心理準備迎接新成員，佢話已經做好晒準備，仲報埋湊BB課程，雖然請咗陪月，但都希望自己可以體驗吓湊BB樂趣，起碼都識換吓尿片吖！
問佢鍾意仔定女？佢就話老婆鍾意女多啲，佢自己就冇乜所謂，仲話仔都好o架，因為太太怕太陽曬所以冇陪佢一齊打網球，所以依家寄望喺個仔身上、到囝囝大啲就會訓練佢打網球，起碼將來有個對手打波喎。
Henry話囝囝改名由太太負責，至於將來讀書嘅安排就交畀家姐，事關家姐育有兩個小朋友，好有經驗喎。