政情：八網難逃：家長送酸薑話梅 幫葉劉提神
立法會議員葉劉淑儀日前因為幫襯某食肆加餸而同啲網民爭論，尋日竟然收到酸薑、話梅同陳皮喎，到底搞邊科？
市民對港教育失信心
葉劉尋日喺Facebook 貼文，話自從佢當選教育事務委員會主席以嚟，每日都有好多市民、家長同校友聯絡佢，希望面談反映現今香港教育嘅問題同提供意見，而尋日佢就同一班中產家長食晏，聽佢哋反映香港教育嘅問題，又指其中一位家長更對香港教育制度失去信心，不斷查詢有關點樣入讀內地知名大學嘅嘢添！
而喺散席時，班家長就送咗份小禮物畀佢。乜嘢嚟？葉劉打開一睇原來係迷你包裝嘅陳皮、酸薑同話梅，咁蹺呢啲都係佢細個鍾意食嘅零食。點解送呢啲嘢？佢話班家長知道佢將會喺教育事務委員會主持大量會議，所以送畀佢嚟提神喎。