政情：立會諸事不順 月曆遲派個幾月

政府延定新立法年度

其實，今次遲派月曆都唔關秘書處事，之前聽聞立法會大樓多次被衝擊後，政府遲遲未定出新立法年度嘅開始日期，搞到立法會印製月曆嘅工作都被拖延，呢個月曆復會後約半個月，尋日終於「隆重登場」，真係遲到好過冇到啦。

按照近年做法，月曆一般會以十月開始，至下一年嘅九月結束，當中列明該立法年度嘅所有大會、政府幾時宣讀施政報告同財政預算案等日期。睇番今年月曆同樣由今年十月至下一年九月，大會都係定喺星期三，財政預算案就定於明年二月二十六日，之後嘅兩星期，即三月頭都冇會開，未知係咪預計部分議員要離港出席兩會。

此外，月曆仲列出辯論施政報告致謝議案嘅日期係下月十三日至十五日。不過，內會仍未選出正、副主席，有關辯論已經延期，並會回復至為期兩日嘅立法會例行會議，依家仲未知道辯論會改到去邊日。相信月曆因為改唔切而出錯，真係計劃趕不上變化嘞！