中環出更：倡每日步行45分鐘 馬清楠盼全城正向
雖然大家都知道，做運動有助強健體魄，但礙於緊湊嘅都市生活，要「的起心肝」保持恒常運動就唔係人人都做得到。熱衷多項球類同水陸運動嘅保良局主席馬清楠就主張每日步行四十五分鐘，並率先向保良局嘅同事推廣，期望呢股正向意念將來可以感染全城咁話。
馬清楠話鼓勵做運動，最好係設定一個容易達到嘅目標。日行四十五分鐘，只要搭少程車就做得到，當養成習慣之後，步行時間就可以逐漸加碼，尤其是現今嘅小朋友，唔想嬌生慣養的話，就更需要透過運動來培養出意志同毅力。佢又認為行山係一項好值得推廣嘅活動，因為一旦起步，就要堅持到終點，好難中途而廢。至於跑步，就適宜報名參與一啲賽事，藉此驅使自己多加練習，以達到指定時限之內跑完賽程嘅目標。而保良局明年一月舉行嘅慈善跑，佢都考慮跑埋一份，但到底係跑半馬，還是選擇十公里呢？咁就要視乎贊助人嘅金額嘞！
顧東華稱室外練跑最佳
慈善跑既鍛煉體能，亦兼做善事，總理顧東華當然唔會缺席。儘管近來應酬多多，但佢都盡量抽時間去練跑。佢認為要練跑，健身室嘅跑步機並唔適宜，因為跑步機係由機器去帶動人嘅步伐，加上室內空調穩定嘅溫度同濕度，都同戶外跑步賽道嘅環境相去甚遠，所以跑手日常鍛煉，最好到室外「腳踏實地」。
副主席陳黎惠蓮、空手道運動員李振豪、劍擊運動員方凱申同羽毛球運動員曾穎昭都有到場，而另一名總理湯振傑以前喺美國留學，就不時沿水塘道路跑步，後來成為劍擊運動員，就嚴格按照體院所訂嘅間歇跑來強化體能。佢話間歇跑，係快跑一段時間就轉為慢跑，然後又全速衝刺，繼而再放緩步伐，不斷嘅張弛較維持穩定嘅跑速要辛苦得多，因此退役後，佢就好少採用呢種練跑方法。
卓妮