香港電台報道手法一直備受質疑，多名立法會議員尋日喺立法會一個委員會上再次紛紛批評港台製作偏頗，其中旅遊界立法會議員姚思榮直指，港台節目喺近來嘅遊行示威報道中偏向同情示威者，保險界立法會議員陳健波（波哥）直情話，好多人都覺得港台應該執笠添。雖然個個都鬧爆港台，但廣播處長梁家榮就死撐港台並無偏袒，有恪守持平客觀喎。睇嚟佢個秤同外界真係唔多相同喇。

尋日姚思榮喺立法會資訊科技及廣播事務委員會上話，每次睇港台嘅時事節目都認為節目係偏向同情示威者，而市民因示威造成嘅生活問題、有人受凌辱等就睇唔到節目有詳細去講，質疑到底呢啲特輯節目係咪各方面都報道，仲問當局有冇統計過添。而批發及零售界議員邵家輝就問到，既然港台嘅節目會諷刺政府，會唔會另設時段都畀建制派諷刺埋另一邊，認為咁先平衡咁話。

而每次講起港台都好勞氣嘅波哥今次亦都忍唔住出聲鬧爆，話好多人都覺得港台唔公道、有偏頗，直言市民唔係想港台幫政府，而係希望港台中立啲。佢又話，自己隨便喺網上出個貼文，都大把人鬧港台鬧到飛起，所以港台唔能夠漠視大家嘅怨氣，直言︰「除非你自己完全覺得冇問題，你可以繼續喺你嗰個烏托邦生活」。

波哥又提到，部分市民分唔清邊啲係新聞、邊啲係節目，「你啲節目你自己認為係嬉笑怒罵，有人就覺得係醜化緊好多嘢、好肉酸」，仲話港台收視低，被反對擴建都唔止因為開支過大，亦都因為睇唔到其價值，只係睇到港台破壞香港，甚至民間都有聲音認為港台應該執笠。

被議員連環炮轟，梁家榮就死撐話唔認同港台有偏袒，又聲稱喺連場風波下港台收到嘅建議及投訴有約八千多項，但收到嘅讚揚有三萬多項，港台會遵守電台約章，給予各方表達不同意見嘅機會。而佢哋嘅烽煙節目就有唔同意見嘅人發表個人睇法，內容係不能篩選嘅。至於港台嘅諷刺節目同公共事務節目，獲邀或答應出席嘅建制派人士係多於非建制派人士喎。

港台每年花咁多公帑，但就經常都被人鬧爆內容偏頗，如果只係聽支持者嘅意見，而唔理外間怨氣有幾大嘅話，睇嚟佢哋嘅新大樓有排都唔使望可以得到議員通過撥款興建得成喇。