中環出更：陳帆開會冇備課 畀人問到口啞啞
為咗提高物流業嘅持續發展，運輸及房屋局局長陳帆尋日喺立法會相關事務委員會，話準備將來往香港嘅跨境直升機服務範圍擴大到整個廣東省。點知轉個頭議員譚文豪詢問相關資料，陳帆就口啞啞答唔出。陳帆靜咗幾秒就開始帶大家「遊花園」，之後見情況唔掂，即刻「卸膊」畀民航處處長李天柱，但李天柱就直接話「冇資料」，兩個最後都答唔出，場面一度尷尬到笑。
「遊花園」未能過骨 極速卸膊
陳帆話物流業嘅新措施其中包括發展跨境直升機服務，並且得到國家民航局同意。譚文豪發言時問，符合資格嘅機場，內地有幾多個？陳帆就話其實整個廣東省都係可探索區域嚟嘅，譚文豪話想知實際數字，陳帆就死撐話「大範圍講係等你了解呀！」跟住仲即刻「卸膊」畀李天柱，叫李天柱回應問題。無奈之下，李天柱惟有話深圳機場係其中一個啦，但冇其他地方嘅資料喎。話音未落，譚文豪即刻笑咗出嚟，話「我都唔知講乜嘢好」，仲叫陳帆會後再作書面回覆。
基本資料都冇 非首次甩轆
陳帆「甩轆」已經唔係第一次啦，今次提出一個項目竟然連基本資料都唔知道，自己搞唔掂仲要即刻「卸膊」，下次記得事前「備課」，費事又嘥晒大家時間啦！
卓妮