中環出更：周永健憶馬票 獎金天文數字
唔知大家有冇聽過「馬票」呢？係咪一頭霧水呢？馬票喺一九七六年已經冇賣，畀六合彩慢慢取代，不過聽聞「馬票」好刺激好好玩o架！
沙田馬場日前舉行廣東讓賽盃，原來喺一九四七年至一九七六年間，每一個馬季都有得買「馬票」，而秋季大馬票就係用廣東讓賽盃做開獎方法。馬會主席周永健話「馬票」首先要攪珠抽出入圍號碼，之後將啲號碼隨機各編配一匹馬，當中只有部分馬會喺指定嘅馬票賽事出賽，排第一嘅馬匹對應嘅馬票就係頭獎馬票，順序落就係二獎同三獎，其他入圍號碼都有現金獎嘅。聽落都覺得好難贏啊，要過五關斬六將先入到圍。
周永健話當年大馬票頭獎彩金去到後期超過一百萬元，喺七十年代一百萬可以買五幢太子道嘅樓，簡直係天文數字！所以當年好多人都會買「馬票」，當買個希望，發個百萬富翁夢！
馬會大董李家祥同太太關賜卿就話好多年前有玩過吓「馬票」，不過唔係成日買，通常買完就算，唔覺得自己有機會中。對「馬票」嘅細節都唔係好清楚，因為耐到唔記得咗啦！
施榮懷覺得買波易中啲
香港中華廠商聯合會永遠名譽會長施榮懷就話細個冇錢買「馬票」，爸爸就可能有買嘅，當年中「馬票」好大件事，事關人人都希望改善生活嘛。佢話平時賽馬都係買獨贏或連贏，頂多買三重彩，其他孖寶嗰啲都唔識買，佢反而鍾意買波多啲，因為得兩隊，感覺上容易中啲。
佢話觀察到呢六、七年多番啲年輕人鍾意賽馬，好似佢細仔咁，喺美國讀書，但同成班朋友都鍾意賽馬。佢話買馬同買波各有好處啦，賽馬係一個社交活動，每個星期都可以去馬場同朋友聚下，雖然可以約朋友一齊去酒吧睇波，但好多賽事都喺夜晚舉行，難啲就時間囉！
卓妮