政情：鄭松泰搵嘢嚟鬧 陳健波上得多Fb都有罪
立法會財務委員會尋日朝早選舉副主席，估唔到已經成功連任主席嘅保險界議員陳健波（波哥）都成為眾矢之的，被多名泛民主派議員狙擊，最騎呢係鬧到冇嘢好鬧，議員鄭松泰竟然叫波哥唔好玩咁多Facebook（Fb），因為冇益兼壞腦，不如同朋友食飯傾吓偈仲好，原來上得Fb多都係罪嚟。
稱玩得多冇益 會壞腦
財委會副主席候選人之一嘅林卓廷話其政綱係「監察政府，制衡健波」，又話波哥做主席亦應避免口舌之爭，否則會引起不必要嘅爭議，拖慢會議程序。至於鄭松泰開頭就話波哥以為批出撥款就可以疏導民意，但實情係批出撥款仍然引起市民反彈先至係問題所在；佢仲話理解波哥過去呢幾年咁鍾意玩Fb，唯一存在嘅驕傲就係獲得其他人認同，但鄭就叫波哥唔好玩咁多Fb，其實係冇益嘅，會壞腦，建議波哥不如同朋友食飯傾吓偈好過。
講番正題，財委會經過四次、近三個半鐘嘅會議，尋日終於選到副主席，結果金融界議員陳振英以三十三票當選，擊敗只得十八票、來自會計界嘅梁繼昌。