政情:議員撐示威 陳帆扯晒火「交通燈做錯咗啲咩」

政府修訂《逃犯條例》引發起連月激烈示威衝突,港鐵車站成為攻擊目標外,全港多組交通燈都畀示威者打爛晒,真陰功!有立法會議員喺一個事務委員會上火力全開,話示威者不滿港鐵成為政治工具先要喺車站搞破壞,點知運輸及房屋局局長陳帆就「爆seed」,火冒三丈咁反問議員「交通燈又點解要打爆佢呢?交通燈又做錯咗咩事呀?」最後要委員會主席打圓場先收到科!

面都紅晒 反問黃碧雲

事緣議員黃碧雲喺會上力數港鐵不是,又話港鐵喺近期示威活動成日幫住警察同政府,立場理應保持中立,又話示威者打爛港鐵車站係因為不滿港鐵成為政治工具,本身陳帆都好聲好氣,話自己都好想知點解港鐵過往咁盡心盡力服務市民,都要畀人打,點知愈講愈「扯火」,面都紅晒咁反問番黃碧雲,交通燈做錯咗咩事,啲示威者要打爛晒喎,咁又講得幾有道理嘅,錯就錯在政府點解搞咁耐都平唔到亂,連累埋無辜嘅交通燈囉!

第一手消息請下載on.cc東網iPhone/iPad/Android/Windows Phone Apps