中環出更：泛民得而復失 陳恒鑌冷手執熱煎堆
今年立法會多個事務委員會選舉正、副主席進度緩慢，但仍然有啲進度理想，好似交通事務委員會上星期就以自動當選方式選出議員易志明同譚文豪做正、副主席，點知會議完結前譚文豪突然請辭，皆因佢話睇番日誌發現有幾次會議未必能夠出席，搞到尋日要再選過副主席，仲出乎意料地落埋入建制派手上，令到本身正、副主席數目唔多嘅泛民主派再少一席，得而復失。
無心插柳做交通副主席
尋日會議一開始就進行選舉副主席程序，泛民就推舉曾擔任委員會副主席嘅林卓廷，譚文豪亦有和議，正當以為好順利可以自動當選，點知就殺出程咬金喇！建制派議員何啟明突然提名曾任委員會主席嘅陳恒鑌，陳聽到時都有啲猶豫，停頓幾秒先答「接受喇」，成功阻截林卓廷自動當選。而泛民見勢色唔對，急召喺隔籬房開會嘅議員返嚟投票，但最終於事無補，陳以十六票比十一票當選副主席，畀建制派壟斷晒正、副主席。
有泛民喺會議中大鬧唔公平，問點解建制派可以咁賤，連副主席都攞埋，亦有人嬲爆爆、面燶燶咁離開會議室，形容今次建制派攞嚟衰，揚言未來全面拉布喎。陳恒鑌指自己無心插柳下做咗副主席，強調事前無預備、無部署，只因有人無端端辭職喎。
卓妮