中環出更：舞獅舞龍要變通 譚定邦：太辛苦細路唔敢學
舞龍舞獅經常喺喜慶活動中助興，已經係香港傳統文化之一，但香港龍獅麒麟貔貅體育總會主席譚定邦就話，現時嘅舞獅表演與佢當年學習嘅模式有分別，直言唔變唔得，點解呢？
香港文化中心露天廣場外尋日起一連兩日舉辦非物質文化遺產市集，今次已經係連續第四年舉辦，譚定邦就聯同弟弟譚定基一齊上場，另外非物質文化遺產地脈協會多人到場力撐，包括主席趙式慶、董事林曉盈和黎志偉。
譚定邦話，現時舞獅受制於人手不足，好多環節都已經簡化咗，而人手唔夠亦都同冇人學有關，事關以前初學要艱苦練好基本功，但依家嘅小朋友只會當興趣，太辛苦逼佢哋紮馬痛到喊，最終只會令佢哋唔敢學囉！不過，並唔係全部都簡化晒，佢就話以前只會幫獅頭點睛一次，而且點喺眼瞼上，費時篤盲隻獅子，但現時為遷就喜慶活動，做法都唔同喇。
林曉盈：學嘢唔好只追求成績
林曉盈就認為，文化同藝術息息相關，但好多人因為唔擅長藝術而未有深入認識，窒礙咗推動文化，所以佢主張摒除框架，唔好畀成績所限，好似囝囝學樂器都唔會追求級數，等佢可以享受音樂。佢又相信，從飲食入手推動會較易令人接受文化，就好似佢都鍾意食街頭小食，所以有計劃未來設街頭小食。
趙式慶：傳統文化要與時並進
今年活動唔止介紹本土嘅非物質文化遺產，連韓國嘅僧侶都邀請到場表演法鼓，節目豐富。趙式慶就話，文化透過交流形成，香港同鄰近地區嘅文化亦可稱得上同源，所以有需要認識外國文化。對於有人嫌非物質文化遺產老土，趙就認為傳統文化都要與時並進，思考點樣適合現今社會嘅方式去呈現，否則就冇咗生命力，但點都要保留核心精神同內涵。
卓妮