膠袋徵費已經實施咗十年，但市面上濫用膠袋、過度包裝嘅情況仍然存在，就連環境局局長黃錦星尋日自己都話，「三個麵包四個膠袋」嘅情況唔合理，所以要研究將唔影響衞生嘅食品剔出豁免範圍，仲話呢個方法比提高膠袋收費更值得研究喎。其實膠袋徵費實施咁耐，期間都未有任何改進，以致今時今日都仲有濫用膠袋情況。黃依家先話明年就膠袋稅徵費水平同豁免範圍進行檢討同諮詢市民意見，真係唔知等到幾時喇。源頭減廢係環保重要一環，政府睇嚟都要「源頭減廢」至得喇。
