政情：立會啱啱開波 吳永嘉即退出兩委員會
立法會大部分委員會上周選完正、副主席，結果塵埃落定。往年建制派「冧友」加入多個委員會，選完正、副主席之後，就會陸續退出，議員吳永嘉（Jimmy）尋日就去信退出兩個委員會，睇嚟退會潮開始出現喇。
話因為公務繁忙
Jimmy去信立法會房屋事務委員會同交通事務委員會，話自己因公務繁忙而退出。Jimmy回覆查詢時否認投完票選主席就退會，話係因為自己當選工商事務委員會主席後，覺得依家香港經濟咁差，工商界應該好多嘢忙，所以考慮到實際工作情況，認為難以兼顧到咁多個委員會，所以就決定退出喇。佢又話，退出兩個委員會都係啱啱先決定，仲未知會唔會退出其他委員會嘅。
其實根據過往經驗，好多議員喺委員會選出正、副主席之後都會退出委員會。通常個個都係聲稱自己太忙而退會，唔知下一位又係邊個呢？