政情:蔣麗芸當選惹質疑 斥泛民亂噏

建制同泛民今年關係麻麻哋,並無好似往年商討各個事務委員會正副主席人選,建制拎咗唔少正、副主席位置,好似議員蔣麗芸(Ann)早前就鍊贏醫學界陳沛然(Pierre),做衞生事務委員會主席,不過惹來質疑,阿Ann尋日就開腔自辯,反斥泛民亂講嘢喇。

尋日立法會一個委員會上,有議員形容阿Ann當選衞生事務委員會主席係笑話,凸顯出霸道一面。呢番言論當然引起阿Ann不滿喇,佢就強調自己係一人一票下當選,如果泛民覺得有其他候選人比佢適合,就應該搵多啲人加入衞生事務委員會,指泛民至少有廿四票在手喎。不過講真,現時建制喺議會中佔多數,就算泛民全數加入都唔夠票喇。

重提陳沛然只得6票

另外,阿Ann重提當日Pierre只得六票,因為當時有啲投畀議員黃碧雲,亦有人缺席,所以Pierre才會落敗,大鬧佢哋唔好亂講嘢喇。不過黃碧雲就反駁,批評建制派恃強凌弱,只肯喺手指罅流少少主席位畀泛民喇。

此外,衞生事務委員會尋日下晝選副主席,做過食衞局局長政治助理嘅建制派陳凱欣以二十票,擊敗泛民嘅李國麟六票,當選成為副主席。

第一手消息請下載on.cc東網iPhone/iPad/Android/Windows Phone Apps