政情：搶先申請政府服務 侯志強為物業把關
新界農地多，又有唔少丁屋同建築物，唔知原居民係咪擁有特別多物業呢？早前鄉議局舉行執委會，會議室門外就有人擺攤檔，講明為業主而設，其中上水鄉事委員會主席侯志強仲搶先登記，唔通真係大地主？
話自己冇錢先要申請
呢個攤檔屬於土地註冊處，攤檔拉起直幡同擺放小冊子，主要介紹同即場登記一項政府服務，只要畀錢登記後，業主所擁有嘅物業一有文書交去土地註冊處就會收到通知，防止物業喺唔知情嘅情況下，被人賣咗或抵押，一聽就知畀業主嘅服務，唔關無殼蝸牛事喇。
不過，侯志強就搶先填表登記，唔通手頭上好多物業，要訂購服務幫自己把關？點知侯志強竟然填完表後，先發現服務係為物業把關，之後又話自己冇錢先要申請喎，到底佢係無睇清楚就填表，定係指有物業曾經中伏，所以搞到無錢要申請補鑊呢？