政情：泛民舌戰陳健波 財會選副主席又再拖
立法會財務委員會經歷近十小時，才選出保險界陳健波（波哥）連任主席，但副主席就拖到尋日再開特別會議處理，今次競爭仲更加激烈，由二十五人角逐副主席一職，包括公民黨郭家麒在內嘅多名泛民議員就向波哥借題發揮，郭家麒大鬧陳健波對於啲工程「皇帝唔急太監急」，波哥就反擊郭家麒「最乞人憎」，雙方舌戰，結果拖足兩個鐘都未選到副主席，拖到變冇米粥，睇嚟建制屬意連任副主席嘅金融界陳振英都有排等啦！
廿五名副主席候選人中，只有爭取連任嘅陳振英為建制派代表，其餘全部都係民主派互相提名下產生，多人借機批評波哥，好似議員梁繼昌講明爭副主席要制衡政府同波哥，就知波哥注定成為會議主角。
郭家麒話，財會本身要監督政府，避免將市民血汗錢倒落鹹水海，但現時卻肆無忌憚不斷通過超支大白象工程，大彈波哥「皇帝唔急太監急」，如果唔係佢繼續做主席，民主派都毋須咁努力爭副主席做，直言唔可以畀佢把持財會。
波哥：人人都知郭家麒乞人憎
波哥隨即反擊，話好多市民話唔使理郭家麒講嘢，因為冇人會信喎，仲話人人都知郭「最乞人憎」，結果引起民主派起哄，拖慢晒選舉副主席程序。波哥見到會議搞成咁都話，既然呢番衷心說話令會議拖延，所以決定收回喎。
不過民主派點會輕易收貨呢，郭家麒就重申，自己只係形容會議形勢，估唔到會搞到波哥自認太監，批評波哥言論不堪入耳，要求佢道歉，但波哥明言絕不道歉，畀人話完太監仲要向佢道歉係冇天理，仲話郭家麒都傻傻哋添。
泛民為黨友出頭 嘲諷「自動波」
郭家麒嘅黨友就幫佢出頭，其中議員譚文豪就「以其人之道，還治其人之身」，大鬧波哥傻傻哋、垃圾、太監同賤人，又叫波哥做「自動波」，因為任何政府議案都「自動波」通過。不過佢鬧完隨即話收回，用以顯示唔可以用收回咁樣玩，叫波哥尊重吓議會。隔多陣見波哥仍然唔肯道歉，譚文豪就話要為自己喺早前嘅侮辱而道歉。波哥認為譚早就應該道歉，但唔好旨意會學佢而向郭家麒道歉，因為冇需要，亦唔會向惡勢力低頭喎。
會議花咁多時間對罵，當然唔夠時間去選出副主席喇，所以會喺周五再設兩小時特別會議繼續選舉。舌戰得咁激烈，希望唔使好似選主席咁，開成十個鐘頭會先搞得掂喇，否則積壓嘅議程真係唔知點算啦！