放完個悠長暑假，立法會喺今個星期復會，而喺尋日同今日，仲陸續選出十八個事務委員會嘅正、副主席。最近建制同泛民嘅關係持續僵化，雙方都冇乜點傾正副主席人選，喺尋日首日會議入面，民主派議員喺會上不停提名同埋提規程問題，搞到有近半會議都仲未選到主席，當中包括比較重要嘅保安、司法及法律事務、同埋發展。有成近半會議都咁玩法，唔知點收科呢？

尋日立法會就其中九個事務委員會選出正、副主席，其中保安、發展、司法及法律事務同埋人力事務委員會都選唔到正、副主席，而剩番嘅五個事務委員會當中，衞生事務委員會仲要加埋時，先至啱啱好選到主席，由民建聯蔣麗芸以廿二票勝出，贏咗醫學界陳沛然同埋民主黨黃碧雲。

保安同司法及法律事務呢兩個事務委員會都係有超過五十名委員，喺保安事務委員會會議中，由於民建聯陳克勤競逐連任主席一職，所以會議就由副主席涂謹申主持，而成班民主派就係咁提出規程問題，質疑做緊同保安相關嘅委員會正副主席，仲可唔可以做候選人，同埋委員會嘅定義。

喺緊接嘅發展事務委員會當中，民主派議員不停提名，有多達十個候選人，當中有九個係民主派，剩番嘅就係建築、測量、都市規劃及園境界謝偉銓。

民主派就不停提名，激到保險界陳健波鬧爆玩嘢同埋唔好浪費時間，仲憤而離場添！

而喺司法及法律事務委員會入面，委員會主席梁美芬競逐連任，有份競逐主席嘅人民力量陳志全（慢必），就話因為唔接受梁美芬喺上一年度嘅會議中，拒絕就修訂《逃犯條例》草案召開公聽會，所以決定當仁不讓出選。梁美芬聞言就即刻要求慢必講番係涉及邊一日同埋邊一個會議，仲叫事務委員會秘書翻查記錄添，搞到個會剩番嘅時間都係討論應唔應該搵秘書澄清。

至於四個選到主席嘅委員會，分別係財經、公務員及資助機構員工、環境同埋資訊科技及廣播事務。其中財經嘅正副主席，就由金融服務界張華峰同會計界梁繼昌連任；公務員及資助機構員工嘅正副主席就由工聯會郭偉強同勞工界潘兆平出任；環境就由獨立何君堯連任主席、副主席就由漁農界何俊賢出任；而資訊科技及廣播事務就由資訊科技界莫乃光出任主席，民建聯葛珮帆出任副主席。