政情：施榮懷「踩場」 斥克魯茲言論荒謬
美國參議員克魯茲（Ted Cruz）早前訪港，話行喺街頭見唔到有暴力行為，特首辦早前就回覆佢嘅言論，話簡直匪夷所思。香港中華廠商聯合會永遠名譽會長施榮懷最近都忍唔住呀，直接喺克魯茲嘅社交平台貼文，批評克魯茲話所謂「見唔到暴力行為」係荒謬嘅講法。
建議上網睇吓示威者惡行
施榮懷喺貼文中質問克魯茲喺香港係唔係每日坐喺酒店房，但偏偏唔睇新聞，事關本港嘅傳媒已廣泛報道有關嘅暴力事件，佢又建議克魯茲上網，詳細咁睇吓示威者到底做咗乜嘢？事關網上面遍布示威者嘅惡行，包括癱瘓公共交通、破壞商店同交通、攻擊警察同持唔同立場嘅市民。
反修例惹起嘅激烈衝突持續逾四個月，到依家仍未平息。施榮懷直言唔相信美國會容忍好似香港出現嘅暴力事件，發生咗幾日都唔會容忍，何況香港持續咗幾個月。最後佢呼籲克魯茲要講真相，唔好對示威者嘅暴力行為視而不見。