醫院管理局下周一（14日）起，將委託中文大學喺公立醫院進行病人調查，用電話形式訪問吓啲住院病人感受，順便了解多啲醫療問題，包括環境設備、醫護人員等，希望可以收集資料，再作出改善提高服務質素喎。之不過依家住院病人增加，有醫院仲要喺病房走廊加床畀啲病人瞓，試問病人瞓走廊感受會如何？真係諷刺，如果調查結果又係大部分病人都感到不滿，咁其實唔使做調查都知答案喇！
