政情：梁世民提醒運動時勿忘護齒
好多人都話要少食甜嘢、定期洗牙等去保護牙齒，但原來運動時加倍小心都係保護牙齒嘅一種。香港專業及資深行政人員協會副會長梁世民（Sigmund）貴為牙醫，就話年中都遇到唔少人因為運動唔小心撞斷或撞甩牙齒嘅年輕人嚟求診，仲話因為「玩」，搞壞隻牙，真係好唔抵，事關牙齒跟你成世o架。
梁醫生話，做牙醫咁耐，見過最嚴重嘅個案就係一個婆婆搭小巴，落車時唔小心跌親，上排牙齒甩咗五、六隻，下排都甩咗幾隻，仲成個口損晒添，要即刻送院急救，跟住先慢慢整番啲牙，前前後後都用咗四個月先搞掂，所以老人家真係要小心啲，牙壞咗真係好麻煩。
叫年輕人唔好玩得咁搏命
梁醫生又話，一年都有三、四個年輕人，因為踢足球或打籃球唔小心，撞甩咗門牙，咁就要花一筆錢去整番好啲牙，真係好無奈，手腳整親仲可以醫好，但牙齒壞咗真係好難痊愈，最好就運動時小心啲，唔好咁搏命，保護好牙齒咁話。