政情：復會戒備 要求執勤警登記泛民被斥無理

兩陣營都叫張建宗出席解畫

雖然建制泛民喺內會拗到火花四濺，不過兩邊陣營都覺得，張建宗應就反修例及禁蒙面法風波到立法會解畫。好似熱血公民鄭松泰就提到，政府以《緊急法》推行禁蒙面法時曾強調，香港並非進入緊急狀態，認為政府講法有矛盾。建制派就覺得，依家有人暴力破壞鐵路等，加上食環署至今仍未有清理違法張貼嘅標語，張建宗應要有統籌和協調能力止暴制亂。內會主席李慧琼就話，會向政府爭取官員出席特別內會。

內會其後討論下周三《施政報告》嘅安排，秘書長陳維安就提到，行管會主席梁君彥已宣布，到時會發出黃色警示，警方或需要喺大樓內候命，強調佢哋只會喺特定地方候勤同戒備。

不過唔少民主派議員都不滿呢個安排，郭家麒話，自己啲議員助理好驚，警方執勤時冇戴委任證，到時有數以百計嘅警員入立法會，令人擔心，建議秘書處先登記核實警員身份。民主黨黃碧雲就建議立法會增聘保安，立法會唔應該再搵招惹麻煩嘅人進入大樓，表明唔接受開會時有警方駐守，又擔心警方會喺大樓施放催淚煙同實彈。

建制派就似乎未驚過，高佬賢就認為，警察每次進入立法會大樓執勤時，都屬於非常緊急嘅情況，如果要求每位警員都要登記，會阻礙警方執法同部署。佢嘅黨友、身兼行管會成員嘅陳克勤就透露行管會將會討論呢件事喎。

施政報告並未安排視像會議

此外，議員都好關注特首會唔會用視像方式向立法會發表《施政報告》，陳維安表明，依家冇安排任何視像會議。內會法律顧問馮秀娟就話，《基本法》同《議事規則》都冇清楚訂明發表方式，但《基本法》就列明立法會嘅職能係聽取《施政報告》，但自殖民地時期起，行政首長向立法會發表《施政報告》，都係親身向立法局或立法會讀出，特首應考慮傳統，若改變應諮詢立法會。

下周三若無法撤逃犯例將順延

此外，內會已有共識，如果下周三政府無法撤回修訂《逃犯條例》，將會順延至下一會議，陳維安仲講明到時唔會有辯論同投票添。今次內會咁多嘢拗，結果連選內會正副主席都選唔切，下周二將會開九個鐘會，只係處理選正副主席，唔知到時選唔選到呢？