中環出更：公幹思鄉 李豐年想當年幾貴電話費都照打
離鄉別井到外地工作，好多時都會想念家人，點樣可以解決到思鄉之苦呢？卓妮近日喺一個慶祝酒會上，見到香港進出口米商聯合會副主席李豐年（Kenneth），佢講起後生時要去外地傾生意，有時都會停留一段時間，當想念父母，都會打長途電話返香港聽吓佢哋把聲，就算長途電話費貴都要打。睇嚟真係幾貴都唔夠親情貴呀！
Kenneth話，依家科技先進，喺外地就唔止聽到家人把聲嘞，仲會用手提電話同佢哋玩FaceTime，而睇Facebook嘅相都有助紓緩思念嘅感覺。
江素惠寫信 廖書蘭睇家人相
同場仲見到香港台灣工商協會榮譽會長江素惠同鄉議局執委廖書蘭。江素惠就講起三十年前因工作關係要嚟香港，一直做到退休，之後就喺香港定居，當年遇到唔開心嘅事情，只有寫信同家人傾訴，收到家人寄嚟嘅信真係好開心，因為得到家人鼓勵，令到佢喺一個陌生嘅環境慢慢習慣。佢又話，依家有時都要去公幹，咁就最掛住香港嘅朋友同埋美食嘞。
至於廖書蘭就話，自己八十年代尾由台灣嚟香港工作，最大嘅問題係唔識講廣東話，好多時都會被人欺負，曾經諗過自殺添，幸好銀包放咗同家人嘅合照，當見到張相嘅時候，就感受到家人嘅溫暖，所以打消咗輕生念頭。佢又話，之後將唔開心嘅嘢化為動力，用盡「洪荒之力」不停學廣東話，喺工作上見朋友，都會棄用自己嘅母語，改用廣東話溝通。
卓妮