政情：梁志祥社會再亂都好 民生工作唔停得
政府尋日公布天水圍天秀路公園隔籬嘅空地將會起臨時街市，預計最快出年年底前落成啟用。立法會議員梁志祥尋日喺Facebook上載咗一段短片，都提及呢項民生工作。
議辦被毀 打爛晒兼掟汽油彈
佢話有街坊問佢點解政府要喺呢個時間推出呢？依家社會立立亂，市民連車都唔敢搭，政府乜唔係應該止暴制亂先咩？咁依家又真係幾亂(口架)，梁志祥都話喺屯門同天水圍嘅議員辦事處都畀示威者破壞，畀人灌水同打爛晒啲嘢，天耀邨嘅辦事處仲要畀人掟咗三個汽油彈入去縱火添！
議辦被破壞，梁志祥都好嬲，要求警隊加強力度執法，但佢話就算現時社會氣氛仲係好緊張，政府都要繼續關心居民嘅需要，民生工作唔停得，尤其要正視一啲市民爭取咗好耐嘅社區設施。