政情：八網難逃：做甄韋喬孫女婿 要守「十誡」
身為家長，都會好緊張下一代嘅終身幸福。願景基金會主席甄韋喬儘管已進身爺爺，已經好重視孫女將來嘅婚嫁對象。日前佢就同副主席馬家強，各自手執寫上「我無處不在」或「若你騙我，我會揭穿」等多項規條嘅T恤，莫非要向外界發放訊息，要做我嘅女婿或孫女婿，就必須通過「十誡」？
同意追求者「要有一份工」
甄韋喬解釋，T恤只係馬家強送畀佢同佢兒子甄偲瀚嘅禮物，所謂「十誡」只係博君一粲嘅幽默字句。雖然含戲謔成分，但當中有好多規條都係得到甄韋喬嘅深切認同，譬如第一條告誡追求者「要有一份工」，的確係免於飢寒嘅先決條件；而第八條指「她是公主，而非征服對象」，亦係追求者應該秉持嘅心態。
至於昔日甄韋喬結婚，外父同外母有無列出類似要求呢？佢話無，對方只係話兩口子活得開心就夠啦！不過，佢認為一個有膊頭、有腰骨嘅男人，根本毋須人家開口，都會自動自覺去善待老婆咁話。