政情：未復會先嗌定財會全年OT

積壓44議程 涉款逾700億

往年立法會財會都係喺四月左右先開始加會，但喺上一年度，財會就積壓咗成四十四項議程未審議，涉及七百幾億元嘅撥款，所以波哥話有絕對理由去加會。

陳健波陳振英競逐連任

依家財會一般喺星期五下午開四個鐘會，至於嚟緊點樣加會，佢就話預計星期五上午都開會，每星期應該會開OT，仲希望由四個鐘加到變八個鐘添！

財會將於今日開會，選出新一年度嘅正、副主席，現任正、副主席嘅波哥同金融界議員陳振英將會競逐連任。依家兩派議員關係咁差，波哥都相信民主派會派議員同佢競逐，但佢就話事實上建制派人數比較多，而且對佢冇異議，仲話投票係暗票，希望民主派議員會支持佢喎。

如果今日財務委員會順利選出正、副主席，將會喺下星期五開始復會審議，波哥就話據知政府會初步定咗頭十項議程，當中包括T2主幹道同埋茶果嶺隧道、四間醫院擴建及重建、興建海水化淡廠、公務員加薪等無爭議性嘅民生項目。引起廣泛社會討論嘅「明日大嶼」前期工程撥款，波哥就話唔包括喺首十項議程嘅，但估計政府可能會調前。

另外，佢提到有民主派議員去信政府，要求喺審議公務員加薪時，將警隊加薪嘅項目作分開表決，但政府已拒絕要求。佢形容係一個危險嘅先例，擔心一旦開咗先例，風氣會沒完沒了，舉例話如果有議員唔滿意學校表現，反問係咪要將教育局職員加薪分開處理，認為唔可以一竹篙打沉一船人。

不過，依家局勢日日都變，復會後都唔知會點，到時係咪真係開到OT，真係要拭目以待喇！