中環出更：市民驚戴口罩犯法 衞生防護中心答非所問
禁蒙面法實施將近一個禮拜，好多市民都唔太清楚條法例係點，有好多疑問，又驚平時唔舒服或者避免感染病毒而戴口罩，都變成犯法，搞到人心惶惶。有市民就寄咗封Email畀衞生防護中心，問佢哋市民病嘅時候戴口罩會唔會犯法同埋有無法律保障。點知衞生防護中心嘅回覆，竟然係點樣「正確使用口罩」，答非所問，無厘頭到爆！
回覆教人「正確使用口罩」
市民署名為「病了的香港。人」，Email入面話有位休班救護員懷疑因為唔舒服喺巴士戴口罩，畀警察用禁蒙面法拘捕。市民就問喇，衞生防護中心一直都呼籲市民喺病嘅時候戴口罩，咁喺十月五號禁蒙面法生效前，中心有冇檢視戴口罩會對市民構成法律風險同有咩保障，如果冇檢視嘅話，中心又會唔會撤銷或者更改相關呼籲？
點知衞生防護中心就用佢哋網頁「正確使用口罩」嗰版覆番人，但嗰篇文淨係話戴口罩係預防呼吸道感染嘅其中一個方法，如果戴得啱，可以有效預防由飛沫傳播嘅疾病，之後再補多篇點樣戴口罩。大佬啊，人哋係問戴口罩會唔會犯法，你就叫人學吓點樣戴口罩，根本答非所問，都唔知你噏乜，衞生防護中心總監黃加慶醫生你咁敷衍人點得o架！
卓妮