中環出更:忙到三餐唔定時 趙麗娟食維他命補充

有調查發現早餐喺一日三餐之中最重要,但有好多人都會忽略食早餐習慣,就好似香港會計師公會前會長趙麗娟咁,佢都係忙到三餐都唔定時o架!真係要小心身體喎。

卓妮早幾日見到趙麗娟下午時分同人喺置地廣場一間餐廳傾緊公事,傾傾吓電話又不停響,接完電話之後又繼續傾公事好繁忙,過咗一陣見佢冇咁忙行過去同佢打招呼,叫佢食完飯先做啦,佢話好忙三餐都唔定時,再問佢有冇食早餐?話自己廿幾年都冇食早餐習慣,朝早起身飲杯咖啡到中午先食飯,晚飯有時成十點先食。

佢都話其實知道咁樣係唔健康,所以會食維他命丸補充吓身體,仲話自己好鍾意食嘢,但食量唔算好多,所以佢食飯時趁個胃有Quota嘅時候,就會揀啲健康啲嘅食品嚟食,均衡番營養。

邱達根一個人少食早餐

轉頭喺歷山大廈見到荔園有限公司主席邱達根同人飲下午茶,離開時問到佢有冇食早餐習慣?佢就話如果屋企人一齊就食,自己一個人就少食。點解?佢話係想keep fit,因為覺得自己成日坐得多唔健康,所以唔食早餐加做運動,嚟保持身體唔好肥落去,仲話年紀開始大要控制體重,最緊要有均衡飲食同做運動,唔食早餐對自己問題不大嘅!唔怪得知佢身形冇乜大轉變啦,原來係有秘訣嘅!

喺另外一個活動上,見到有「美容教母」之稱嘅鄭明明,問佢有冇食早餐習慣?佢就話有呀,食早餐係重要o架,最鍾意就係食吓麥片同埋歎番杯奶茶,就算自己幾趕時間都好,都會食片麵包等個肚唔好空聊聊,佢仲話如果唔食早餐應付唔到繁忙嘅工作。

卓妮

第一手消息請下載on.cc東網iPhone/iPad/Android/Windows Phone Apps