大勇和小剛是裝修工人，工作範圍包括批盪、砌磚和鋪瓦仔等。有一日大勇向小剛表示他的手部不適。大勇說：「你睇睇我對手，紅腫痕癢，仲有脫皮添。」
小剛問：「咁你有無睇醫生呀？係唔係就算搽咗藥膏後，情況都係時好時壞呢？」大勇回答：「係呀，點解你咁清楚嘅？」
小剛說：「我初入行嘅時候都有呢個皮膚問題，你可能患上過敏性接觸性皮膚炎。你對手嘅情況幾嚴重，快啲去睇醫生啦。」小剛續說：「我哋工作經常會接觸水泥，而水泥含有金屬鉻；工作時所接觸嘅水泥會穿透棉紗手套甚至濺入鞋內。如果無佩戴合適防護手套同安全鞋，手腳嘅皮膚會容易過敏。我留意到你每日臨放工時，求其用水沖走身上嘅水泥，咁你嘅皮膚咪有機會長時間接觸住啲水泥囉。」
大勇又問：「有啲乜嘢防護措施可以避免我哋患上過敏性接觸性皮膚炎呀？」小剛答：「放心，我哋可以從多方面着手。首先，避免皮膚直接接觸水泥，例如使用化學品防護手套，仲有穿上防水嘅安全鞋；如果皮膚被水泥濺及應盡快清洗，要用性質溫和的清潔劑清潔雙手，然後塗上潤膚霜保護皮膚。」
小剛續說：「大勇你睇吓我對手，之前患上過敏性接觸性皮膚炎嘅雙手，已經透過以上嘅防護措施而有所改善喇。」大勇答：「我明白啦，我會盡快去睇醫生，同埋做好有關預防嘅措施！」
職業安全健康局
www.oshc.org.hk