邊揸車邊睇手機 的哥捱轟
【本報訊】離晒大譜！揸車要專心，尤其是職業司機。近日有乘客搭的士時，就遇上一段不快經歷。該名司機竟罔顧安全，一邊駕駛，一邊手機睇片，更因唔識路而兜路。乘客不滿的士司機「惡行」，在網上發文怒轟。
唔識路反「問候」乘客
相信是乘客的網民Ron Rgb在Facebook群組「馬路的事討論區」分享這次事件。事發於前日（9日）晚上八時半。乘客力數的哥諸多罪狀：「惡劣無禮貌」、「兜路又問候人阿媽」、「行錯路又唔識路」。乘客強調自己上車時已先後四次說明目的地，誰知對方仍然「行錯路」，最終「兜咗一大個圈」才到達。落車時乘客向司機表示，「唔識路可以問」，誰知竟遭對方「問候」。
不過的士司機最離譜是行車期間「全程睇住手提電話播住片」，從貼文所附短片亦可見到，該名司機在等候交通燈轉燈期間睇片，非常誇張。
的哥的行徑遭網民怒斥「離晒譜」，「揸車睇片真係唔係幾好」；亦有人留言勸事主不必動氣，「使乜勞氣，直接1823投訴」；也有網民無奈說：「好多時，坐的士真係要有心理準備，貼錢買難受。」