政情：八網難逃：返母校見旗幡有感 蕭偉強：給我們一線希望
喺過去反修例持續爆發衝突，勞工及福利局前局長蕭偉強（WK）多次呼籲要「停一停、諗一諗」，但係暴力程度持續升級，未見到出路，佢日前返到母校見到一張旗幡，有感而發，希望「給我們一線希望」。WK日前喺Facebook貼文，話趁換領智能身份證，特登返母校九龍華仁書院，透過舊日足迹，緬懷昔日嘅情懷，佢行遍母校每一個角落。
「刑房」勾起回憶
路過校長同副校長嘅房間，亦勾起佢唔少回憶。佢話當年領獎見校長，照肺見副校長，佢有幸兩間房都入過，以前喺樓梯底嘅校長房已改成透明嘅玻璃門；以前係「刑房」嘅副校長，房外面掛住「 Give them a ray of hope」（給他們一線希望）嘅旗幡，佢就問呢支旗幡係咪有象徵意義呢？
佢跟住就話「Give us a ray of hope」（給我們一線希望），令大家可以持守自由開放、 獨立思考、兼容並包、公開透明、互相尊重同和平協商呢啲一貫嘅核心價值！
依家社會動盪、人心不穩，WK嘅期許唔知幾時先可以達到？