中環出更：何君堯議辦再被燒 揚言拆一建十
自反修例風波以嚟，好多建制派立法會議員嘅地區辦事處都被破壞，一向言論惹火嘅何君堯亦唔例外。佢喺屯門、荃灣同元朗嘅辦事處都遭破壞，連喺元朗天水圍嘅辦事處，就喺禁蒙面法生效前夕再遭破壞。佢梗係嬲喇，但佢話唔驚，仲話要拆一建十喎！
斥暴徒喪失人性
何君堯喺Facebook上載咗幾張相，見到佢喺元朗天水圍嘅辦事處一片狼藉。佢話啲暴徒喺禁蒙面法生效前，游走多區，打、砸、燒、搶，瘋狂破壞！好唔好彩佢辦事處又成為黑衣人嘅目標，破壞之餘仲縱火燒，呢次已經係第二次嘞！佢話好彩火災好快救熄咗，唔係嘅話蔓延樓上住客，後果就嚴重囉！佢仲話黑衣人破壞佢嘅辦事處後，暴徒再喺網上將呢啲「戰績」晒命，炮轟呢種罔顧人命嘅冷血行為，已經完全喪失人性。
其實何君堯啲地區辦事處屢遭破壞，好似佢喺荃灣嘅辦事處咁，之前已畀人破壞過一次，用圍板封起咗，點知荃灣示威者喺十月一日專登去打開圍板再打爛多次。咁多辦事處遭破壞，唔知佢復修嘅進度有幾快呢？
卓妮