中環出更：金錘拍賣官 金鈴時間觀念睇得好重
好多人話時間就係金錢，卓妮早前喺一個手錶品牌慈善活動，見到「金錘拍賣官」金鈴，問到佢對時間觀念時，佢就話自細家教好嚴，所以對時間睇得好重，而且工時長，睡眠時間好短。嘩！咁樣身體頂唔頂得住o架？
再問究竟工作同休息時間點分配？金鈴話可以連續工作四十八小時，瞓覺時間就只有三至五個鐘。再問咁少時間就瞓得夠？佢話係碎片式休息，有時會喺車上或者飛機上小睡一段時間，就可以叉足電做嘢，仲話工作同去活動都習慣早到，可以畀自己有充足準備喎。
林智彬：鬧鐘校早15分鐘響
卓妮喺活動上仲見到鄰舍輔導會主席嚴元浩同副主席戴健文、香港中華總商會青年任委員會主席林智彬（Lawrence) 同埋香港餐飲聯業協會副主席黃浩鈞。問Lawrence有冇時間觀念？佢話自己唔鍾意遲到，床頭鬧鐘通常都校早十五分鐘響，等自己有一個緩衝區起身。至於有時見客同做嘢，佢話多數都會搭公共交通工具或港鐵，同埋會選擇行路，一來可以避開塞車同埋時間捉得會準啲，仲話試過有一次約咗一個日本客人食私房菜，個客人又搵唔到幢樓，自己喺隧道又塞車，足足要個客人等咗半粒鐘，搞到成餐飯不停耍冧，好在都傾得成單生意咋！
黃浩鈞亦話時間對佢嚟講好重要，同人生一樣唔可以浪費。佢話自己做開飲食嘅，就好似沖一杯奶茶為例，時間多同少都會直接影響味道，所以非常重要，佢話讀大學時，課程同考試嘅時間好顛倒，有次要考數學科，因自己賴床遲成半粒鐘先到試場，好彩考出嚟嗰科成績pass，先放下心頭大石。
卓妮