政情：地區工作唔懶得 橄欖柯仔「耍太極」

話說橄欖日前同柯仔兩師徒碰頭，一齊練習耍太極，莫非橄欖要傳授柯仔「耍太極」嘅功夫？其實嗰日係佢哋出席勵行會活動，教長者防跌八式。根據段短片，師傅嘅功架十足，而喺後排跟住學嘅橄欖耍得嚟都有板有眼，反而係柯仔動作較大，有時仲跟唔切做動作添。

柯仔話，平時經常探晨運班組，「耍太極」同「遊花園」都係基本功。但佢強調，面對街坊同求助者就一定唔可以「耍太極」或「遊花園」，仲話橄欖師傅教落，做地區工作唔可以偷懶，更加唔可以「耍太極」，要穩打穩紮，為居民做實事。

政府部門遊花園要追到底

老實講，外界批評政府施政離地，好多部門各自為政，對市民嘅訴求耍得就耍。柯仔都話，如果政府部門「耍太極」嘅話，佢就更加要追到底，唔可以放過佢哋喎。