政情：教壞細路 歸咎老師 吳得掂死撐通識唔失敗

叫老師反思 唔好阻學生客觀發展

吳得掂尋日出席一個活動時仲認為老師應反思係唔係應該咁樣做，憂慮對心智未成熟同學有影響，「你話B就B，話A就A」，阻礙專業中立客觀發展。被問到係咪通識令學生走上街頭，佢唔覺得係讀咗通識就會上街，認為有關假設冇根據添！佢仲死撐唔覺得通識係失敗，話香港有三十五萬名中學生，若全部係失敗嘅話，「你想像一下情況係點唔同」，依家只係一小撮，希望學生慢慢了解後，能夠更客觀去處理。

搞國教一鑊粥 致青年身份認同低

被問到九月開學後有好多學生上街同罷課，佢就話明白學生有自己嘅意見，但應利用一個合情合理合法嘅方式表達，亦唔希望係表達過程中影響到其他人，甚至出現暴力。至於中學生係咪心智未成熟去讀通識，佢就話最初推行通識係高中，因為高中理論上較成熟，但個別學校在小學和初中推行。

話時話，外界炮轟搞到今時今日咁多年輕人上街，仲爆發連串嘅激烈衝突，問題出於通識科教材未必啱中學生，仲有中史變選修科同埋國民教育搞得唔好，令到青年身份認同低，近日亦有前京官批評香港嘅唔去殖民化、反而去中國化嘅教育制度好有問題，要深刻反思。

想當年，吳得掂甫上任，多次被教育界同立法會議員批評「唔夠班」，所以被嘲為「吳得掂」，未幾又發生反對德育及國民教育科獨立成科風波，引發多場大型示威，政府最後跪低，修改國教科政策，取消三年開展期嘅「死線」，交由辦學團體同學校自決係咪展開國教科，之後又因為小三全港性系統評估（TSA）亦引發操練問題，立法會搞公聽會，佢就走咗日本睇紅葉，仲被嘲為「旅遊局長」，究竟佢對教育政策有幾上心呢？

正所謂有因必有果，若果當年唔係吳得掂搞國教搞到一鑊粥，睇怕都未必會演變成今日咁差嘅局面，吳得掂實在難辭其咎，依家仲將通識科嘅問題推咗落一小撮教師身上，好似唔關自己事咁，睇怕佢想甩身都冇咁易喇！