中環出更：量子電腦出爐 張耀成：難挑戰傳統
科技日新月異，日前有消息指某科技巨擘已建成量子電腦，運算速度較目前嘅超級電腦快十五億倍，咁強勁嘅能力又會唔會對電腦市場帶來影響呢？卓妮早前喺一個活動上見到香港電腦商會創會會長張耀成，佢認為量子電腦現仍處於初步階段，要喺市場上挑戰傳統電腦應該係好多年之後嘅事喇！
張耀成話量子電腦呢種尖端科技，世上各個大國都正積極研製中，而所得成果應該係會率先應用喺航天同國防方面，直至量子電腦技術更新換代若干次之後，先會逐步落入民間領域，情況就同互聯網嘅發展軌迹類似，就算量子電腦可上架銷售，亦唔見得有無敵嘅優勢，因為單憑極速運算，不足以令消費者解囊，例如今日嘅智能手機，其賣點已唔再標榜處理器嘅速度，而係鏡頭影相嘅質素，當科技作為一種商品，就唔係講科技有幾咁厲害，而係着眼喺能否為用家嘅生活帶來愉悅同滿足。
洪文正：可能掀起革命性浪潮
在場仲見到香港電腦商會現任主席王志強、雲端與流動運算專業人士協會會長陳家豪同港島東扶輪社創社社長洪文正。洪文正就認為量子電腦可能會掀起一股革命性浪潮，對好多事物都會構成衝擊。
佢話超級電腦需耗時一萬年之運算，量子電腦幾分鐘就完成，理論上所有加密貨幣都有機會被破解。不過正面咁睇，極速運算又有助新藥測試、解讀基因圖譜同優化人工智能。
數碼娛樂協會主席彭子傑話量子電腦要穩定操作，必須置於近乎「絕對零度」嘅超低溫環境，因此佢好難想像十年八載之後，量子電腦可以喺辦公室出現，但假若量子電腦真係發展至適合商業應用嘅話，動畫製作好多工序都可以加快完成。
卓妮