政府日前舉辦咗首場嘅社區對話會，喺會上發言嘅市民大多鬧爆政府，亦唔見得班高官做咗「沙包」就令市民息怒，但政務司司長張建宗尋日喺網誌仲死撐話對話會絕非政治騷，又話稍後全體司局長會繼續走入社區，同社會各階層市民坦誠對話，唔會「偏聽」喎。老實講，搞到社會大爆發都係因為政府唔聽民意，到依家話唔會偏聽，有人信先奇喇！佢嘅潛台詞係咪繼續唔聽民意，就唔會有偏聽呀？
