政情：曾衝政總前地判囚 黃之鋒返舊地宣布選區會
尋日係違法佔中五周年，曾坐監、目前仍官司纏身嘅香港眾志秘書長黃之鋒（圖），喺泛民立法會議員區諾軒、朱凱廸等人陪同下，宣布參加今年區議會選舉，出選南區海怡西選區。
早前涉圍警總被捕准保
值得留意的是，黃宣布參選嘅地點，是佢喺五年前衝擊俗稱「公民廣場」的政府東翼前地外嘅行人路。
資料顯示，黃之鋒官司纏身，佢早年曾因衝擊政總東翼前地被判囚，及至近期，佢因參與六月廿一日包圍警總被捕，其後獲准保釋，案件押後至十一月初再訊。
被問及會唔會擔心被取消參選資格，黃指，當區有其他民主派工作團隊，已經商議咗應變措施，又話與其擔心會否被取消參選資格，倒不如擔心政府會否取消區議會選舉。
佢解釋「根本中央、政府及建制派驚輸，企圖押後甚至取消區議會選舉。」直指若喺國際社會關注、本地抗爭持續不斷嘅情況下，仍被取消資格，可見政府早前所設立嘅對話平台係完全不存在。