政情：同屬受害者 被捐器官 梁美芬叫人唔好起底
喺日前政府舉辦嘅對話會後，部分發言嘅市民隨即被網上起底，而曾慘遭起底、被盜用個人資料登記捐贈器官嘅立法會議員梁美芬尋日喺社交平台上載一段短片，講起即使有人唔同意會上發言市民嘅言論，都唔好去起佢哋底。睇嚟佢係感同身受，有感而發嘞！
梁美芬喺短片中強調，市民當日喺對話會中嘅發言係光明磊落，叫唔同意佢哋言論嘅人千祈唔好對佢哋起底，亦唔好去佢哋嘅工作地方進行滋擾，影響佢哋嘅工作，事關咁係不文明嘅舉動，更認為反對派亦應譴責呢啲起底嘅行為。
提到近期嘅示威衝突，佢話以前有任何紛爭，大家都講話交畀法庭解決，但到咗今時今日，有啲示威者喺衝突中採取「私了」，就連外國遊客見到都覺得震驚，尤其香港係法治之區，製造暴力衝突嘅人用「私了」傷害唔同政見嘅人，市民係絕對唔想見到。
話官員做聆聽「沙包」係好事
對於政府喺首場對話會嘅表現，佢認為官員做聆聽「沙包」都係一件好事，一嚟畀市民表達對政府嘅不滿，二嚟亦可以畀政府解釋遇到嘅難處，但對話會仍有改善嘅空間，又話唔單止特首要落區，而其他問責官員都要多啲落區，聆聽市民嘅意見同訴求喎。