政情：公民講場：羅致光派糖圖撲火 無奈市民唔收貨

本港因修訂《逃犯條例》引發嘅風波搞到立立亂，經濟民生受影響，民怨四起，火頭處處，反政府聲音不絕。勞工及福利局局長羅致光尋日就「派糖」撲火，推出多項民生措施，包括僱員再培訓局推行「特別愛增值計劃」，畀六月起失業、近日被迫放無薪假、開工日子不足嘅市民可報讀三個月課程，如出席率超過八成，每個月可領取上限四千元津貼。此外，羅又宣布重推一次過嘅「N無津貼」，不過就要明年七月先推出，真係等得嚟都蚊瞓。呢啲小恩小惠，惠及嘅只係失業人士同基層，但不滿政府嘅人就遍布社會各階層，少少「糖」係咪就可以平息民憤，真係好難講喇。