政情：冇參與建制派聯署 鍾國斌話係想鬧多兩句
一班建制派立法會議員發表聯署聲明，話美國國會參眾兩院嘅外交關係委員會通過受理《二○一九年香港人權與民主法案》係冇必要，又批評此舉係粗暴干預香港內部事務，仲話對此深表遺憾同強烈反對。不過，身兼自由黨黨魁嘅紡織及製衣界立法會議員鍾國斌（Felix）就未有參與聯署，唔通又做「壞孩子」？Felix澄清，並非唔簽，只係想修改份聲明，鬧多美國佬兩句，不過其他建制派議員就唔等佢喇。
批評美方不合情理及偏聽
參與聯署嘅包括自由黨其餘三名立法會議員，Felix接受訪問時批評美方只係容許一小撮人去發表意見，又冇邀請不同意見嘅人，係不合情理同偏聽。佢其後亦特別發表聲明，表明反對審議有關法案，又批評有關聽證會未有全面了解港人意見，做法偏頗，有欠公允，未能解讀本港實際情況，強調單靠聽證會發言就去決定通過議案，絕不合情合理。
此外，同為建制派嘅立法會議員田北辰同樣冇參與聯署，佢其後喺社交網站指，自己因事離港，剛剛才查閱訊息，所以遲咗回覆，話自己都同意聯署內容喎。