政情：老公判監換樓醜聞落幕即放榜 馮程署任5年終坐正

仕途停滯不前 被不少後輩趕過

下月就五十五歲嘅馮程，一度被視為「AO（政務官）明日之星」，佢喺二○一四年七月中起出任民政事務局常任秘書長，可算係相當年輕就開始署任D8，AO近年一般署任兩、三年就可以升正，但馮程正正喺一六年爆出換樓醜聞，其後仕途一直停滯不前，至去年馮程調至前身中央政策組嘅創新辦出任總監，但仍未獲升正，即署任D8超過五年，被唔少後輩「爬頭」趕過。政圈一般相信，馮程未獲升正嘅原因，與其換樓醜聞未告一段落有關。

近年皇榜多數喺五月底、六月頭就搞掂，今年原本都特別遲，喺七月中才公布，但其時就唯獨欠缺D8未放榜，其時政府解釋係因為仲有工序未完成。不過，政圈有聲音猜疑，係咪同馮永業案件未完結有關，亦有政圈中人估計，或者係因為近日修例風波，影響到有啲內部會議未必開得成。馮永業最終喺本月十二日，因一項公職人員行為失當罪名成立，被判監九個月。事隔約兩星期，D8皇榜就喺尋日公布，馮程終於坐正，到底D8延遲放榜同馮永業案件未公布有冇關係，就真係冇人知嘞。

其餘獲升政務官皆僅署任兩年

至於其餘獲升正D8嘅政務官，包括商務及經濟發展局常任秘書長（工商及旅遊）利敏貞、政制及內地事務局常任秘書長鄧忍光、發展局常任秘書長（規劃及地政）甯漢豪、教育局常任秘書長楊何蓓茵，以及財經事務及庫務局常任秘書長（庫務）劉焱，全部都喺二○一七年起署任D8，即係署任兩年已經獲升正，部分遲過馮程入職，即係馮程同後輩職級終於睇齊。

咁遲才公布D8升正嘅名單，到底會唔會影響加人工呢？有知情人士就話，應該唔會，因為通常可以追溯番呢幾個月嘅加幅嘅。不過，可以肯定嘅係，馮程署任咁多年，即係搞到加少幾年人工嘞！