中環出更：退稅草案遲遲未過 梁繼昌認為無爭議
立法會大樓喺今年七一被攻陷，令到立法會運作受到影響提早兩星期休會，其中一樣最令人關注嘅係退稅嘅有關議程仲未通過，涉及各位打工仔女嘅荷包，就連泛民議員梁繼昌都要出手，睇嚟係希望一復會後可以盡快處理。
《2019年稅務（修訂）（稅務寬免）條例草案》早就列喺議程內，與財政預算案中退稅百分之七十五，上限最多二萬蚊嘅稅務寬減措施有關，但呢項議程可謂多災多難，原本六月尾放上立法會恢復二讀，先後因建制派拉布及立法會提早休會而仍未審議，搞到至今都仲未通過，市民退稅隨時受到影響。
修例程序卡住喺立法會一關，而財政司司長陳茂波又喺上個月決定將退稅提升至百分之一百，所以政府要向立法會提出修正案，將退稅嘅百分比相應增加。
動議修正案預告限期已過
立法會連幾時復會都未知，但退稅同市民息息相關，當然愈快通過愈好，泛民議員通常都唔會阻撓。法案委員會主席梁繼昌尋日就向委員發文件，話其個人意見認為呢份修正案不具爭議性，法律顧問都話無發現有問題，而動議修正案預告限期已過，政府需要尋求批准免卻預告，所以就問諮詢委員對修正案有冇意見，同埋係咪唔反對政府尋求立法會主席批准免卻預告喇。梁繼昌截稿前未有回覆。開會前做定準備都係好事，希望一復會就可以盡快處理到喇。