中環出更：換季執衫簡陳擷霞話環保就冇煩惱
近日天氣啱啱開始由夏季轉為秋季，每逢轉季好多人都有執衫嘅煩惱，要將唔適合當季着嘅衫收埋，分分鐘要搞足全日才執完。博愛醫院副主席簡陳擷霞同林群早前出席沙田馬場舉行嘅博愛盃時，林群就話每逢換季要執衫，都要用幾日時間才搞得掂，聽落真係好誇張。至於簡太就話自己冇執衫嘅煩惱，原因竟同環保有關。咁特別？
簡太話，自己唔算太多衫，執起上嚟都好容易，有啲衫可以着成十幾年都冇問題，因為仲係好新淨，覺得仍然可以着，冇理由就咁丟咗佢，咁樣又夠晒環保，真係一舉兩得添呀。至於林群就解釋，執衫要執幾日，其實係因為平日工作太多，所以就要慢慢執啫。女人講起衫就特別好傾，佢話，自己平日買衫都好少去外國買，通常都喺香港買，一來買完可以畀相熟嘅裁縫改番啱尺寸，二來又可以振興香港經濟咁話。
袁志平曬衫趁機陪太太
同場仲有主席吳錦青、副主席李柏成（Jim）及總理袁志平都有出席。講起換季執衫，Jim就話一啲都唔煩，因為全部都係老婆搞掂晒，聽落真係幸福到令人羨慕。佢話，自己都有幫手執o架，不過其實啲衫都唔多，香港又並非好凍，買嗰啲西裝通常四季都可以着，就算天氣凍，裏面着件冷衫打底就OK嘞，不過有時執執吓，都發現有啲衫原來冇着過，喺唔想浪費下，就會夾埋太太啲衫一齊捐畀慈善機構。
另外，袁志平就話，換季執衫係同太太指定動作，最少都玩足成日，仲好有心得咁教路話，皮褸久唔久要攞出嚟曬吓佢，如果唔係會發霉。執衫執到曬埋褸，咁咪好攰？佢就講笑話攰，但唔夠膽出聲喎。講完笑又講認真，佢話，平時工作忙，都冇乜時間陪太太，趁呢個機會同太太增進吓感情囉！
卓妮