政情：今日你上鏡：首個倡派錢議員 羅祥國賀70大壽
庫房水浸，但政府就撳住荷包，因為生活壓力，派錢變咗市民嘅其中一個訴求，但大家又記唔記得邊個係首個要求政府派錢嘅政界人士？佢就係前立法局議員羅祥國（CK），尋日係佢七十歲大壽呀！
CK唔單止喺香港中文大學做研究，亦係一間民間青年智庫嘅特別顧問，智庫一班成員尋日就送上壽桃為佢賀壽，見佢笑到見牙唔見眼，仲豎起七隻手指寓意自己七十歲嘞！
智庫喺Facebook貼咗賀壽相同幾張舊相，hashtag話CK當年有六舊腹肌o架！真犀利喎。唔單止咁，佢仲係香港中文大學第一屆學生會會長，亦參加大學泳隊嘅，唔怪之得當年佢咁Fit。
當年建議被當笑話
點解佢倡議派錢？咁就要講番二十幾年前嘞！話說一九九五年十一月立法局辯論寬減稅項嘅議案，當年係經濟學者嘅CK提修訂，發言時建議政府每人派五千蚊，為咗避免市民只係將啲錢存入銀行唔用，話可用消費券形式發放。
呢個建議當年被政界笑到面黃，政府亦當笑話一則，最後喺立法局被大比數否決，但時移勢易，近年派錢已變咗市民嘅訴求，政府亦要跪低派錢。
（互聯網）