政情：婦女慘受乳癌苦 蔣麗芸鬧爆政府
喺香港每十五個婦女就有一個患上乳癌，比率仲高過子宮頸癌同大腸癌，但香港到依家都仲未有計劃推行全民乳癌篩查。咪就係因為政府慢吞吞囉，啲立法會議員都批評政府藉口多多，一味靠拖，搞到一班婦女冇得受惠囉！
立法會支援癌症病患者事宜小組委員會早前同香港乳癌基金會同癌症策略關注組一行人去台灣考察，佢哋話台灣已實行咗全民篩查二十年，仲有埋乳房攝影巡迴車，走入社區幫婦女做乳癌篩查。
拒推全民篩查藉口多
委員會主席蔣麗芸（Ann）指政府好應該學吓台灣，話同政府講咗咁多年，政府一係話無錢，一係就話喺醫學上有爭議，驚驗咗出嚟係「假陽性」會嚇親啲婦女。結果拖啊拖，去到舊年出施政報告，食物及衞生局局長陳肇始先話開始進行研究。阿Ann話政府咁多藉口，其實可以一句話KO：「如果免費，你會唔會叫你老婆做篩檢先？」
佢話會將台灣考察嘅結果提交畀施政報告參考，希望多啲婦女可以去定期檢查，尤其係基層婦女，見做一次檢查成千幾蚊就肉赤，最後搞到乳癌晚期先得到治療，但已經太遲。佢叫政府可先畀啲有乳癌家族史嘅婦女先去做篩查，雖然人數唔算多，但可以令婦女覺醒，起到一個教育作用。