反修例嘅示威浪潮已逾一百日,但絲毫冇冷卻迹象,有人歸咎示威源於有深層次問題,即係房屋,但香港大學首席副校長王于漸就有另類看法,仲大談投胎問題喎。
王于漸尋日出席一個午餐會講房屋政策,話今日香港要解決並唔係房屋問題而係貧富懸殊,因為房屋問題係貧富懸殊其中一個象徵,所以香港要解決嘅係貧富懸殊,直言現時貧窮家庭無法上流,而且房屋階梯亦因無錢、無能力爬上去而斷咗囉,但佢大潑冷水話問題無得解決,因為揀錯老竇投胎無咗希望喎!
唔單止咁,佢話仲有另一個老竇,就係政府,但要唔要呢個老竇就唔知喇,事關每個周末、每個晚上打開電視都知喎。一聽就知佢講緊近期示威活動喇!佢就叫政府要做番個老竇,提供高跟鞋畀人企上呢條階梯度,之後就可以用房屋紓緩到貧富懸殊問題,直言一味搵地建屋唔能夠解決問題,因為現時問題並非在於房屋供應量少而係無錢喇!