政情：話叻人去哂讀醫 李國章撐通識科責師之過

近年愈嚟愈多人不滿通識，認為會對學生洗腦，令佢哋諗埋一邊，連曾經力撐通識嘅人都改口，大彈通識教育失敗，係導致年輕人出問題嘅重要原因，足證通識科爭議極大。現時改革通識科嘅聲音不斷，好似就有人倡議改為選修科，最近又搞到教材提出自願送審。

堅持設科無錯 係執行得差

李國章同通識科關係密切，全因當年有份推動設科。不過，佢尋日就為自己往績辯護，強調通識科無錯，只係執行上做得唔好，因為當時訓練老師唔夠，推出時無教材畀老師，亦都無睇堂視察教成點。

通識科一直被指同五年前違法佔領行動有關係，而近期嘅反修例風波亦與通識科扯上關係，但李國章就話通識與反修例無關，因為現時社會問題成因複雜，並唔係通識科教壞學生上街掟磚咁簡單，反指香港嘅貧富懸殊先係大問題，政府要諗政策畀香港人有希望，睇到前景喎。

為通識科辯護完都要拋改善方案，李國章就將矛頭直指老師。佢先話最叻嘅學生紛紛選讀醫科、法律，但教育就吸引唔到佢哋，跟住又話唔想批評老師，但老師都要自我反省係咪以身作則，有冇為香港同下一代着想，直言老師幾時都可以做好啲，但又兜番話自己都見過好好嘅老師可以啟發學生，同時都有不負責任嘅老師，呢個情況各行各業都有，好似有好醫生同時都有缺醫德嘅醫生喎。

佢仲話要教好老師，如果老師唔好，畀最好嘅教材都唔會識得運用，就算將通識改做選修科，老師教得唔好都一樣喎，至於老師上堂講政治無問題，但唔好單方向將理念灌輸畀學生。

社會分歧大 楊潤雄要諗計

立法會教育界議員葉建源就認同李國章指社會混亂有好多原因嘅講法，因為單純歸咎通識科係過於簡化，為政府施政過失作掩飾。不過，佢認為李國章將責任轉移去老師上係鹵莽同無根據，認為李作為前教統局局長要還香港老師一個公道喇。通識問題爭議大，而且分歧仲大，今鋪真係考起教育局局長楊潤雄喇！