中環出更：密會5泛民 漢奸黎又攪局
喺過去逾三個月反對《逃犯條例》修例嘅示威遊行中扮「總指揮」，被內地官媒點名批評賣港嘅「叛國禍港四人幫」壹傳媒黎智英（漢奸黎），尋日又喺其何文田寓所內密會五名民主派人士，當中包括同為「叛國禍港四人幫」嘅民主黨（白鴿黨）前主席何俊仁（AV仁），仲有喺違法佔領行動案（佔中案）被判囚八個月但獲緩刑兩年嘅白鴿黨前主席李永達（高達）。咁啱，民陣擬喺九月二十八日佔中五周年同十月一日搞集會遊行，唔通佢哋又密謀攪局？
話說漢奸黎喺中午十二時左右獨自返回其寓所，而其七人車喺大約一時亦駛回寓所，現場所見，高達坐喺司機位隔籬，其後七人車駛入寓所大閘後，就見到AV仁、該黨立法會議員林卓廷同前議員單仲偕落車，並步入寓所內。大約十五分鐘後，就見到收咗漢奸黎部分秘密捐款「袋住先」九個月嘅工黨前主席李卓人獨自坐的士抵埗。
包括AV仁及高達 傾近個半鐘
密會近一個半小時後，即下午約二時二十分，李卓人首先登上七人車離開，佢喺塘尾道同旺角道交界落車後，七人車又折返漢奸黎寓所，再接走AV仁、高達、單仲偕同林卓廷。七人車經西隧抵達中環郵政總局，當時只有AV仁落車，隨後又將高達送抵金鐘立法會，當時見高達面紅紅，似乎係飲過酒；最後林卓廷同單仲偕就喺演藝學院對開落車。
漢奸黎同民主派反修例大合唱，多次參與反修例遊行，仲企喺遊行隊頭，又去美國唱衰香港，而民陣喺本月十五日舉辦嘅遊行不獲發「不反對通知書」，大批市民當日自行到港島「行街」，身穿黑衣嘅漢奸黎同AV仁亦有現身，喺非法遊行扮「總指揮」。
其實，但凡喺大型嘅反修例遊行前，漢奸黎都會密會民主派人士，而民陣計劃喺九月二十八日佔中五周年同十月一日搞集會遊行，咁蹺漢奸黎尋日又同班民主派密會，睇嚟又想搞搞震嘞！
民主阿婆說三道四 刷存在感
話口未完，同被內地官媒點名批評係「叛國禍港四人幫」之一嘅「民主阿婆」、前政務司司長陳方安生發表聲明說三道四，話政府絲毫冇吸取五年前佔中教訓，強行推出修訂《逃犯條例》，爆發民憤，又話社會已到咗好危險關頭，暴力解決唔到問題，只會帶嚟更加多仇恨，政治問題需要政治解決，呼籲大家冷靜處理。
時事評論員陳雲生指，暴力衝突已經三個月，民主阿婆今時今日先出嚟講停止暴力係太遲，質疑佢「刷存在感」，而呢番說話可能會引發更多人出嚟遊行，明顯係火上加油，直斥民主阿婆做咩都有居心，估計佢今次想「放風」試吓水溫，睇吓政府仲有咩牌就真！
卓妮