政情：運房局應耀康退休 唐智強接燙手山芋

高官音樂椅又轉動

話時話，依家公營房屋短缺，公屋管理又千瘡百孔，又有消息話政府會重推租者置其屋計劃，唐智強喺呢個咁嘅時候接手呢個燙手山芋，真係要打醒十二分精神喇。

應耀康喺政府工作三十六年，而喺做運房局常秘任內並唔好過，事關喺二○一五年爆發公屋鉛水事件，一發不可收拾，立法會政府帳目委員會喺二○一七發表報告，炮轟房屋署處理公屋食水含鉛危機時態度散漫，偏離既定程序，更點名批評應耀康難辭其咎，對此感到極度遺憾，而政務司司長張建宗回應有關報告時，亦承認應耀康喺事件上敏感度不足。

至於其他嘅官員調動方面，現任社會福利署署長葉文娟亦將於十月二十一日出任保安局常任秘書長，接替將展開退休前休假嘅黎陳芷娟，而前香港郵政署長梁松泰則於十月九日接任社署署長一職。至於現任勞工及福利局副秘書長（福利）戴淑嬈，則於十一月十一日出任政府產業署署長。